Anect nebɣu nuɣal ɣer deffir deg umezruy, a naf tafriqt n ugafa d Imaziɣen i tt-izedɣen, akken ttwasnen ɣer imazrayen imaṣṛiyen, igrikiyen d ilatiniyen s waṭas n yismawen: Libu d Tinihu (teltalaf iseggasen aya). Igaramantiyen, At Muṛ, Inumidiyen, Ilibiyen, atg. Alami d tallit taṛumanit, igduden i tesdukel tutlayt d yidles, llan ttidiren deg yiwet n tɣeṛma taqbuṛt. D amṛay n tmezgida neɣ d afellaḥ, ttidiren bḍan ɣef yedrumen. D beṭṭu i d-igran d tidett s wazal-is deg umezruy n imaziɣen. Ɣas akken bedden Imaziɣen mgal yal imnekcem, dacu kan d tikelt taxeṭṭayt i deg ssawḍen ad sbedden tigeldiwin yerṣan. Uɣalen d ilatiniyen qbel ad uɣalen d inselmen, lameɛna yal tikelt ttbegginen-d dakken mgaraden aked wiyaḍ di yal taɣeṛma i d-ikecmen.

Tagelda n imaziɣen tamenzut ittwassnen, d tagelda n Masenen ( ger 240 d 149 QM), igɛawnen Sibyun Afriqi mgal Qaṛṭaj. Akken kan sserṣan Iṛumaniyen iman-nsen di tefriqi, ufan-d iman-nsen zdat n yiwen umḍebbeṛ Amaziɣ nniḍen ameqṛan, yellan d mmis n mmis n Masensen, wagi d Yugurten (ger 160 d 104 QM). Di tallit n ttṛadat ger yegduden, agellid anumidi Yuba I ittekka di tdukli aked Ipumpiyen mgal Qayṣeṛ. Ɣer useggas 52 QM, tagelda n mmis Yuba II yerna-tt-id Ugust ɣer temnaṭ n tefriqt. Yuba II yellan d Amaziɣ yuɣalen d aṛumani, d amusnaw, d win ijemmɛen alalen n tẓuri, tettunefk-as Muriṭanya d tarzeft. Mi tt-terna Ṛum ɣur-s deg useggas (40 BM) akken ad tessimɣeṛ tagelda-s akk ɣef tmazɣa, kkren-d imaziɣen, ḥettmen Iṛumaniyen ad qqimen kan di temnaṭ n umalu n Maṛṛuk n tura. Taɣeṛma Tamaziɣt tkemmel deg idurar.

Deg unekcum n waɛṛaben i yebdan deg useggas 647, bedden mgal-nsen Imaziɣen i waṭṭas n lweqt ddaw leḥkum n Aksil, syen dakin, ddaw leḥkum n tmeṭṭut iwumi qqaṛen Dihya (ɣer 695). Bla ccek, di lqeṛn wis VIII, ttwaḥettmen Imaziɣen ad ḍefṛen tineslemt. Lameɛna ibeddi-yagi-nsen ikemmel mi ḍefṛen taxariğit, ayagi daɣen d sebba n yiwet n tnekra i d-illan deg useggas 740. Ur ssawḍen ara Waɛṛaben ad ssensen taluft alami seg useggas 761 d akin. Uɣalen ɣer deffir di temsalt n uqehheṛ n tazwara n unekcum-nsen, ğğan Imaziɣen ad idiren s leɛwayed-nsen d yedles-nsen di tgeldiwin n Idrisen aked Tahert. Dacu kan ur iɛeṭṭel ara umsefhem gar-asen, di tagara n lqeṛn wis IX, kecmen Imaziɣen deg yiwen webrid adiyani nniḍen wagi d Cciɛa i yemgaraden ɣef txariğit, ayagi iwakken daɣen a d-beggnen fad-nsen ɣer timunent. Mi ffɣen Ifaṭimiyen ṛuḥen ɣer Maṣeṛ, aked lmaḍeṛṛa i d-igla weẓdam n Ihilalen, s webrid asunni i dduklen imaziɣen di lqeṛn wis XI aked Imuṛabiden, syen dakin aked Imuwaḥiden. D ineggura-yagi i d-bnan -i tikelt tamezwarut deg umezruy- tadukli n tefriqt n ugafa. Di lqeṛn wis XIII tagelda-yagi n Imuwaḥiden ibdatt-id beṭṭu, tuɣal tefka-d tigeldiwin timaziɣin timaynutin , Imarinen di Fas, At Abdelwadid di Tlemcen aked Iḥafṣiyen di Tunes.

Tlata n tmura n tefriqt n ugafa, Imaziɣen deg-sent d imexḍa : di Libya mazal-iten kan deg udrar n Nefusa, di Tunes : llan deg wazal n tnac tuddar imzerwaɛen di Ğeṛba aked kra di Matmata. Di Muritanya : mazal ddren sin neɣ tlata iderman di tama n Nwaqceṭ. Di Lmaṛuk llan azal n 50% deg wegdud, aṭas deg-sen llan di Rif, Aṭlas aked Sus. Di Lzayer, amur ameqṛan llan di tmurt n Iqbayliyen, deg Awṛas, deg Imẓabiyen aked Twareg deg unẓul.

Ibeddi n yedles Amaziɣ yebda s tidett mi d llant tmura timunan n tefriqt n ugafa. Deg wennar, iduba imaynuten n tmura-yagi ttnadin amek kan ara d-bnun tadukli ger tmura wala ad fken afud i usirem n temnaḍin imgaraden fell-asen deg yedles. Attekki-nsen di tiddukla n tmura taɛṛabin, aked ttsertit-sen yersen ɣef uɛeṛṛeb i yebnan ɣef uɣerbaz n taɛṛabt, yessaweḍ ɣer tnekra n timmuzɣa. Ayagi iban-d deg useggas n 1976 asmi kkren i usenfar azayri n “umitaq aɣelnaw” i deg rran timanit tamaziɣt di rrif s uɛemmed. Aṭas n tmesbaniyin timeqṛanin i d-illan di Tizi wezzu si 80 d asawen, imi imaziɣen ur qniɛen ara s yiwen n ugezdu « Idles d Tantaliwin tiɣeṛfanin » di tseddawit n Lzzayer tamanaɣt. Uɣalen aṭas i yessuturen anekcum n tutlayt tamaziɣt ɣer uɣeṛbaz.