Masinisa

(240-149 av J.-C.)

Masinisa neɣ Masensen, yellan d mmi-s n Gaya n inumidiyen n usamar, illa d agellid amaziɤ amenzu n Numidia yedduklen. Ittuṛebba-d di Qerṭaj, iddukel tikelt tamezwarut aked Iqerṭajiyen wukud innuɤ mgal Sifaks agellid n inumidiyen n umalu, yuɤal daɤen innuɤ mgal Iṛumaniyen di Ṣbenyul. Lewhi n useggas 206 Ijebd-d lexyuḍ aked Sibyun yerna iddukel aked Iṛumaniyen deg umennuɤ-nsen mgal Qerṭaj. S lemɛawna n Iṛumaniyen, iwiw-d Sifaks d ameḥbus deg useggas 203 yerna yuɤ tameṭṭut-is Sufunisb. Ayagi ur yeɛğib ara i Sibyun imi yebɤa a d-ibeggen Sufunisb di trennawt-is, lameɛna Masensen akken ad iqil tageldunt n numidya si lḥecma-yagi, iceggeɛ-as ssem i Sibyun. Akken a t-cekṛen iṛumaniyen ɤef uɛiwen i ten-iɛawen, fkan-as tagelda n Sifaks. Masensen yuɤal dagellid akk anezmar di tefriqt n ugafa, isbedd tageldit-is si tlisa n Tunes alami d Muluya. Amaziɤ-agi ameqran issemɤer s waṭas taɤerma tafniqt yerna yeldi tabburt n tgelda-s i tɤerma tagrikit. Masensen ibedd d agellid i wazal n 57 iseggasen, ittwassen dakken d agellid aḥnin yerna d argaz bu tissas.

Yugurten

(160-104 av J.C)

Yugurten yella d agellid n Numidya ger iseggasen 118 ar 105 QM. D mmi-s n mmi-s n Masensen, ittuṛebba-d deg uxxam n ɛemmi-s Misibsa i t-ceggɛen ɣer Ṣbenyul ad innaɣ ɣer yidis n Iṛumaniyen, iwakken a t-issebɛed fell-as. Lameɛna Yugurten ibeggen-d tirrugza-yines dɣa rebḥen Iṛumaniyen di ṭṭrad. ɣef aya, Yugurten irebḥ-d aṭas n yemdukal di Ṛuma yerna yerra-t ɛemmi-s am akken d mmi-s ayen i t-yerran ittalas di lwert. Mi qrib ad immet Misibsa, ibḍa tigeldiwin-is ger sin warraw-is Hiambsal d Aderbal aked Yugurten. Yugurten d argaz ibɣan leḥkum, iččuṛ d tiḥeṛci yerna ur isɛi yara ṛṛeḥma. Ur ibɣi yara ad iwali Numidya tebḍa, inɣa Hiambsal yerna ikker yer ṭṭrad mgal Aderbal i gessutren lemɛawna si Ṛuma. Lameɛna Yugurten ifka ijɛal i yemḍebbṛen iṛumaniyen dɣa irebḥ-d kra n temnaḍin nniḍen di tgelda deg useggas 116. Yuɣal daɣen iẓdem ɣef tgelda n Aderbal, iṭṭef Sirta deg useggas 113, inɣa Aderbal yerna iqeṭṭa deg imestajren iṛumaniyen yellan di Sirta. Ayen issawḍen Ṛuma ad tekker ɣer ṭṭrad mgal Yugurten. Adeggal n Yugurten Buxuṣ izzenz Yugurten i yiṛumaniyen. Dɣa fkan-as Numidya n umalu alammi d Cercal d tarzeft yerna yuɣal d ameddakel n wegdud aṛumani. Yugurten ittwaḍeggeṛ ɣer lḥebs n Tulyanum anda yemmut si laẓ.

Yuba Wis Sin

(52 av. J.-C. – 24 apr. J.-C.)

Yuba Wis Sin d mmi-s n Yuba Yiwen, yella d agellid n Ibun. Wwin-t d ameṛhun ɣer Ṛum netta mazal-it d aqruṛ. Ittuṛebba-d s lemḥadra sɣur Uktabi weltma-s n ugellid Qayseṛ ameqran wuɣuṛ yerbeh lemziyya. Izweğğ aked Kliwubatr Cilini yelli-s n Antwan d Kliwubatr. Dɣa, lewhi n useggas 30 QM, ifka-yas Qayseṛ yiwet n tgelda ijemlen snat n Muritanyat aked Gituli. Illa d agellid iɣran issawed isğuğğeg taɣerma Tilinit (hellenistique) di tefriqt ugafa. Yura s tegrikit idlisen ɣef umezruy, asalay aked kra yeḍrisen ɣef taklut d umezgun. D argaz iẓewren mliḥ di tusna aked tsekla, Ittwaḥemmel mačči d kra ama ɣer yegrikiyen ama ɣer wegdud-is.

Dihya

Dihya tlul deg yiwen n laṣel amaziɣ aqbuṛ deg wedrum n Iğiṛawen. Dihya neɣ Kahina d yiwet n tgellidt tamaziɣt n lqern wis 7. Tettmettil ṛṛuḥ n ibeddi mgal imnekcam ibeṛṛaniyen ɣer tefriqt n ugafa.

Deg useggas 686, mbeɛd lmut n Aksil aked Tabet yellan d yiwen n umeqran n lɛesker amaziɣ iḥekmen aṭas n iderma, immut deg yiwen imenɣi mgal amnekcam aɛrab. Dihya yellan d aqcict tawḥidt i yesɛa Tabet, tugi ad teknu i ucengu. Teṭṭef taqacuct n temḥaddit yerna tessaweḍ ad tesdukel iderma imaziɣen, ɣas akken dayen iweɛren.

Teɣleb sin iberdan tazemmalt n lɛesker amawiyen s lemɛawna n yemnayen n at Yefren. Teḥkem tafriqt n ugafa 5 n iseggasen. Tettwaɣleb deg useggas 693 sɣur Ḥasan ben nuɛman deg imenɣi-yis aneggaru, ittwakkes-as uqerru deg umkan iwumi qqaren “Lbir n Kahina” Ceggɛen yimeqranen n tzemmalt amawiywen aqerru-yis d licara n trennawt i weḥkim Abd lmalik di Surya.