Ur tesɛiḍ acu ineẓra ɣef ubecceṛ amasiḥi amezwaru di tefriqt ugafa. ɣef akken d-ḥkan imezwura, d Buṭrus s timmad-is i d-yusan ibecceṛ di Qerṭaj, yerna yeğğa dinna Klimun d aqerru n tmezgida.

Qqaren-d daɣen dakken Klimun Aziluṭ tṣaḥ-it-id tefriqt ugafa d ttrika yerna ibecceṛ deg-s Linğil. Rnu daɣen Futin tasamarit tewwi-d Iqerṭajiyen ɣer liman amasihi. D tamɛayt kan ahat ? Izmer lḥal. Akken yebɣu yili lḥal, Qerṭaj iwweḍ-itt lexbaṛ n Linğil zik. Ansi i d-usan yembeccṛen ? Si Ṛuma. Si Lyunan. Si Surya. Si Asya n umalu .....

Di tefriqt ugafa, anerni n imasiḥiyen igla-d s unerni n tmezgidiwin d wayen icudden ɣer uselḥu-nsent. Timezgidiwin timeqranin n wasmi yella Sibtim Sivir (Septime Sévère) neɣ Urilyan (Aurélien) ur d-ttaɛdalent ara aked trebbaɛ n imasiḥiyen imezwura, wala daɣen aked tmezgidiwin timezwura n kra n imeyyaten n imasiḥiyen. D ayen d-ibanen mliḥ, tesɛa azal aked tudert tmezgida. Agripinus yellan d Amṛay amezwaru yettwasnen di Qerṭaj, yessaweḍ a d-yesnejmeɛ di temdint-agi 70 yemṛayen n tefriqt ugafa. D agraw amezwaru n tefriqt i gjerred umezruy. Illa-d ugraw-agi ger iseggasen 218 d 222. ɣas akken illa uqehheṛ, liman amasiḥ iteddu ɣer zdat. Llan kra n 25 n yegrawen n tmezgidiwin deg useggas 256. Uɣalen ugar n sin imuren deg useggas 300.

Nwala timezgidiwin ttwasbeddent di tewwura n uneẓruf, deg Waris aked tmurt n Leqbayel iwwed-itent Linğil i tikelt tamezwarut. Illa-d mliḥ unerni. Agdud amasiḥi s lekmal-is izdeɣ deg unezruf n Ğerid. Liman amasiḥi ikcem ɣer temnaḍin n Aris, n Yemẓabiyen, n Muritanya taqayṣarit. Izennatiyen i yzedɣen di tama n wenẓul n Tlemsan kecmen di tmasiḥit. Lɛerc n At Uraba akk umnen s Lmasiḥ. Tbedd yiwet n tmurt tanaṣlit takatulikt d tameqrant di temnaṭ n Tahert.

Aql-aɣ deg useggas 180. Tamnaṭ n tefriqt ugafa yeṭṭef Ṛruman tella ddaw leḥkum n Viğilyus Saturninus. “D netta i d amezwaru i d-ijebden ajenwi mgal imasiḥiyen”, i ɣ-d-inna Tirtulyan. Imeɣrasen imezwura n tefriqt bḍan ɣef stat trebbaɛ yemxallafen: yiwet di Sili tayeḍ di Maduṛ. Illa ɣur-neɣ lkaɣeḍ n ubeḥḥet aked umerret n 12 imasiḥiyen i yettwanɣen ass n 17 di yulyu n useggas 180 di Sili. Irgazen-agi aked tilawin-agi ismawen-nsen Akilinus, Nartzalus, Spiratus, Dunata, Citinus, Sikunda, Bistya, Vituryus, Filix, Jiniruza aked Janwarya. Atah wayen i yenna Spiratus i weḥkim Viğilyus Saturninus mi yeggul deg-s ad yeğğ liman-is: “Ur nuggad ula yiwen, ma mačči d Ssid-nneɣ Illu-nneɣ i yellan deg igenwan."

Wid n Maduṛ llan di ṛebɛa yidsen, sin seg-sen si laṣel afniq : Miğğin, Sanami, Lusitas aked Numfanu. Ass n 7 si Meɣres, imeɣrasen n Turburu Minus, llan di setta, tella gar-asen yiwet n tlemẓit si ccetla n imerkantiyen qqaren-as Vibia Pirpituya , sin seg yemdukal-is llan d ilelliyen : Sicundulus aked Saturninus. Sin nniḍen llan d aklan : Rivakatus aked Filisiti. Wis xemsa, Saturus, ifka iman-is iwakken ad ittekki deg wayen yeṛğan atmaten-is. Imeɣṛasen-agi ttwameḍlen di Qerṭaj. Tettwasbedd ɣef iẓekwan-nsen yiwet n tmezgida iwumi qqaren : basilica majorum. iẓekwan-agi-nsen ufan-ten deg useggas 1906.

Timenɣiwin-agi llant-d d ahric amenzu n uqehheṛ i yebdan di tefriqt amakken yella di temnaḍin nniḍen n tgelda sɣur adabu ur numin mgal liman amasihi: Aqehheṛ ilḥa seg useggas 180 alammi d 213.

Ula mi yella umedɣul Dyuklityan, yerna-d Maksimyan, i yebɣan ad yessizdeg lɛeskeṛ, Ulac ayen i gzemren ad iḥbes awal n Lmasiḥ. aɛsekṛi Maksimilyan n Tabast (Tbessa), ittwanɣa. Fabyus n Sizari (Cercal), i yellan ittawi tikbabin, ittwanɣa. Tibasyus yellan d amɣar, ittwanɣa. Marsil n Tinği (Tanğa) yellan d ameqran n lɛesker, ittwanɣa.